గజల్ ..........

మౌనాలను పలికించే మాటిమ్మని కోరుతోంది
చెక్కిలిపై చిరునవ్వుల విరులిమ్మని కోరుతోంది ||

అలవాటుగ మారిపోయి నీ ఊసుల కలవరింత
మెలుకువలో నీ పెదవిని పలుకిమ్మని కోరుతోంది ||

సంద్రంలా మదినిండుగ ఆటుపోటు అలజడులే
హాయినిచ్చు బాందవ్యపు తోడిమ్మని కోరుతోంది ||

వ్యవసాయికి చినుకులకై తడికన్నుల ఆరాటం
ధరణి మాత వరుణిడినే జల్లిమ్మని కోరుతోంది ||

చిరునవ్వుల తీరాలూ దూరంగా పోతుంటే
ఆ దేవుని హసితాలను వరమిమ్మని కోరుతోంది ||

త్యాగమంత స్త్రీదైనా అణచివేత తప్పలేదు
శీలాన్నీ దోచేయని గెలుపిమ్మని కోరుతోంది ||

.........వాణి, 3 sep 15