గజల్ కాన్వాస్ .....39

మోమునలా దాచకలా చూపలేవ నేస్తమా ||
తలవంపుకు కారణమే చెప్పలేవ నేస్తమా ||

ఆవేదన మదిలోతున ఏమున్నదొ ఏమిటో
భారమైన గుండెగాధ విప్పలేవ నేస్తమా ||

తరాలుగా తప్పలేదు కలకంఠికి కన్నీళ్ళు
తలవాల్చక బేలవవక గెలవలేవ నేస్తమా ||

చతికిలపడి పోకుఅలా శాంతినిచ్చు కపోతమ
కాంతిలతగ అల్లుకుంటు ఎదగలేవ నేస్తమా||

జన్మనిచ్చు వెలుగుపువ్వు మమతపంచు దేవతవె
నిన్నునీవు రాల్చుకోక ఎగరలేవ నేస్తమా ||

మౌనమైన మాటాడిన నిందవేయు సమాజమే
దృష్టంతా లక్ష్యమౌతు సాగలేవ నేస్తమా ||

వదనాన్ని నీవాణిని దాచుకోకు నెచ్చెలీ
ఈదుతున్న బాధలన్ని ఒలకలేవ నేస్తమా ||

...........వాణి, 5 jan 16