గజల్..................

పువ్వులలో పరిమళాలు ముదముగానె మారుతోంది ||
పరిసరాలు దోచుకుంటు గాలిలాగ మారుతోంది ||

అలలెన్నో ఎగసిపడుతు అందుకొనగ ఆకశాన్ని
నిత్యమైన పోరాటం ఓర్పుగానె మారుతోంది ||

మనసుకడలి మోయలేక కన్నీళ్ళుగ ప్రవహిస్తు
జ్ఞాపకాల గాధలన్ని గజలుగానె మారుతోంది ||

అందలేని విజయాలకు తల్లడిల్లు మనసుల్లో
అనుభవమే పాఠమౌతు గెలుపుగానె మారుతోంది ||

నిన్నలన్నీ కలగలసిన గతములోకి చేరిపోయె
నేటలోని ప్రతిక్షణం చూపుగానె మారుతోంది||

మనుగడనే భారమౌతు మగువమోయు నిందలెన్నొ
మార్పులేని సమాజంలో బరువుగానె మారుతోంది||

రెప్పపడని రాత్రులలో తలపులతో పోరాటం
కొత్తదనపు ప్రొద్దుపొడుపు ఆశగానె మారుతోంది ||

మౌనవాణి స్వప్నాలే చెదిరిపోయి అలసిపోయె
మదిలోతుల చింతలెన్నో మసకగానె మారుతోంది ||