!! గజల్ ...!!

మౌనంలో జ్ఞాపకాల గుర్తులొలుకుతున్నాయి
చూపులలో కంటితడుల చినుకులొలుకుతున్నాయి

తరతరాల ఆత్మీయత కధలుగానె మిగిలిపోయి
మదిలోతున ఆకాంక్షతొ తపనలొలుకుతున్నాయి

అతివృష్టి అనావృష్టి గతితప్పిన ఋతువుల్లో
భారమైన జీవితముల చింతలొలుకుతున్నాయి

మానవతే శాసించే ధనముతోనె నడుస్తూ
అడుగడుగున బడుగువెతల బాధలొలుకుతున్నాయి

వరదలలో వ్యధలెన్నొ ప్రకృతిపై నిందవేస్తు
చెరువులన్ని ఆక్రమణల ఋజువులొలుకుతున్నాయి

చదువుకునే తీరుమారె చదువుకొనే రోజులాయె
వీధిబడులు ఎదురుచూచు ఆశలొలుకుతున్నాయి

......వాణి కొరటమద్ది