గజల్ ...............

వెలుగువెతుకు నడకలలో నాకు తోడు వస్తావా ||
చీకటిలో చింతలలొ నాకు తోడు వస్తావా ||

కనురెప్పల నీలి నీడ దూరమాయె మెరుపుఛాయ
దారిచూపు వేలుపుగా నాకు తోడు వస్తావా ||

మాటకలుపు మనసులేక మౌనముగా మిగిలున్నా
అసహాయపు క్షణాలలో నాకు తోడు వస్తావా ||

గుండెల్లో భారమాయె మదినిండుగ వేదనాయే
చెదిరిపోని చేయూతగ నాకు తోడు వస్తావా ||

జ్ఞాపకాలు విదిల్చేటి కన్నీటి గాధలెన్నొ
తడవకుండ నీడౌతూ నాకు తోడు వస్తావా ||

చెమరింతే చిందుతోంది గమనాలే గరళమౌతు
రాళ్ళల్లో ఆధరువుగ నాకు తోడు వస్తావా ||

కమ్ముకున్న నిశలతెరలు మరుపుమెరుగు అద్డలేను
మినుగురువై బాటచూప నాకు తోడు వస్తావా ||

.................వాణి, 9 dec15