॥ ఎదురుచూపు॥ గజల్ 

మాపటేళ అవుతుంటే నీకొరకని ఎదురుచూపు ॥
దాచుంచిన ఊసులన్ని చెప్పాలని ఎదురుచూపు ॥

పదే పదే సవరింపులు చెదరకుండ అందాలను
కురులలోని విరులేవీ వాడిపోని ఎదురుచూపు ॥

తడి ఆరని పెదవులతో నీపేరే స్మరియిస్తూ
వెలికిరాక నిట్టూర్పులు దాచుకొని ఎదురుచూపు ॥

నును సిగ్గులు చిరునగవులు చెప్పలేని భావాలు
వలపునింపి ఫలాలనీ చేతబూని ఎదురుచూపు ॥

నిరీక్షించు కన్నులలో వెలిబుచ్చని 'వాణి'యలే
శీఘ్రముగా నీరాకలు కావాలని ఎదురుచూపు ॥

....వాణి ,11 May 15