గజల్.....

ఎడారిలొ గులాబిలు పూయడం కష్టమే ||
చింతలో చిరునవ్వు ఒలకడం కష్టమే ||

చీకటుల వెన్నెలల సంగమం జీవితం
సంసార సాగరం ఈదడం కష్టమే ||

గతమైన గాయాలు మచ్చలుగ మిగులుంటె
నొప్పితో గురుతుల్ని మరువడం కష్టమే ||

ఎండతో తేమతో చెలిమేలె మొలకలకు
తడిలేక విత్తులే మొలవడం కష్టమే ||

వేదనతొ పెదవిపై నిట్టూర్పు శబ్దాలు
వదనంలొ హాసాలు విరియడం కష్టమే ||

నిర్జలం నేలంత ఎడారిగ మారితే
మబ్బులే చినుకుల్ని రాల్చడం కష్టమే ||

రోజుల్లో భారాన్ని సహించె శక్తిలేదు
కన్నీళ్ళ కాలాన్ని దాటడం కష్టమే ||

మనసులో యుద్ధమే కలవరాల మౌనంలో
మౌనవాణి మాటల్ని వెతకడం కష్టమే ||

క్షణాలే పరీక్షగ గడచిపోతు ఉన్నాయి
నిత్యమై ఇడుముల్ని వేగడం కష్టమే ||

కనురెప్పలు నిదురనె వెలివేస్తు ఉన్నాయి
కనుపాపకు దప్పికే తీరడం కష్టమే

.....వాణి, 28 jan16