గజల్.................

కడలితోన ఊసులెన్నొ కలతలన్ని తుడుచుకుంటు ॥
మదిదాచిన మౌనంతో మాటలన్ని చెప్పుకుంటు ॥

గతమేదో గుర్తొస్తూ నిన్నుచూడ మనసాయెను
గుండెగదిన గుమిగూడిన గురుతులన్ని విప్పుకుంటు ॥

సేదదీర్చె సంద్రమెంతొ నేస్తంగా పలుకరిస్తూ
మనసువిప్పి చెప్పగానె బాధలన్ని దించుకుంటు ॥

తీరాన్నీ తాకగానె గగనమంత ఉత్సాహం
కనులలోన ప్రవహించె చూపులన్ని హత్తుకుంటు ॥

మౌనవాణి హృదిలోన దాగుండిన భారాలే
భావములై వెలికివచ్చు పదములన్ని కూర్చుకుంటు ॥

కన్నీటిని కలుపుకొని అలలతోన ఓదార్చెను
ఆవేదన ఆలాపన రాగాలన్ని అల్లుకుంటు ||

..............వాణి, 26 jan 16