॥ గజల్ ॥ 

నీవులేక గగనంలొ ఒంటరిగా వెతికాను ॥ 

నీజాడకు తారాడుతూ మౌనంగా వెతికాను ॥ 

మనసంతా శూన్యంగా అంబరాన్ని గాలిస్తూ 

కలతచెంది  కన్నీటితొ  గాయంగా వెతికాను ॥ 

ఏడేడూ లోకాలలొ నీ ఉనికే తెలియకుంది 

తనువంతా కనులు చేసి కలవరంగ వెతికాను ॥ 

అందమంత నీదేగా అలంకరణ  నీకేగా 

అలసిసొలసి సొమ్మసిల్లి భారంగా వెతికాను॥  

మనసులోన నీరూపం నింగిలోన నిశబ్దాలు 

మబ్బులనూ తొలగిస్తూ వేదనగా  వెతికాను ॥ 

గుండెఎంతొ బరువౌతూ నీవులేని వెలితౌతూ 

ఆదేవుని ప్రార్ధిస్తూ గానంగా వెతికాను ॥ 

చీకటినీ చూపిస్తూ మబ్బులన్ని కమ్ముకుంటు 

మనసంతా ముంచుతున్న దు:ఖంగా వెతికాను ॥ 

మధురవాణి మౌనప్రేమ నీదేనని చెప్పాలని 

మనసులోన మమతనింపి కోరికగా వెతికాను ॥ 

  ....వాణి