||నింపాను|| గజల్ 

నా హృదిలో నీ ప్రేమతో పరిమళాలు నింపాను
మనసంతా నీ ఊహల పరవశాలు నింపాను

తరచి తరచి నీకోసమె వేచివుంటు అనుక్షణం
తలపంతా నీ స్పర్శల సంతకాలు నింపాను

మధురమైన నీ ఊహలు మౌనంలో వెలికివొస్తు
నాముసిముసి నవ్వులలో మైమరపులు నింపాను

నీప్రణయపు గుర్తులెన్నో తనువంతా గిలిగింతలు
నీరాకకు పరితపిస్తు ఆకాంక్షలు నింపాను

ఎదసవ్వడి నీపేరే జపియించును ప్రతిసారి
ఆలకించి చెక్కిలిపై చిరునవ్వులు నింపాను

నామదిలోతిరునాళ్ళే నీ నామమే జపియిస్తూ
మధుర'వాణి' పలుకులలో మయూఖాలు నింపాను

....వాణి, 20 March 15