..........ఎందులకో............

.

తెలుగు గజల్...

వెన్నెలంత నీటిలోకి ఒలుకుతోంది ఎందులకో
చెరువులోన కలువభామ కులుకుతోంది ఎందులకో

చెలి చెక్కిట సిగ్గులతో పరవశించు నామనసే
అందమంత నాదేనని మురుస్తోంది ఎందులకో

నీ స్పర్శల సంతకాలు పులకరింతె నామనసుకి
నునుసిగ్గే చిరునగవుల రాలుతోంది ఎందులకో

నిదురరాని రేయంతా నీఊహల సందడులే
చిరునవ్వులు చిరుజల్లుగ కురుస్తోంది ఎందులకో

ముత్యాల్లా రాలుతున్న నీ నవ్వులు సంపదలే
ప్రతి ముత్యం నీ రూపం చూపుతోంది ఎందులకో

జ్ఞాపకాల భావాలే అక్షరాలై ప్రవహిస్తే
గాయాలే గేయాలై మారుతోంది ఎందులకో

...........వాణి