||ఆమని సొగసులు || తెలుగు గజల్...

తరువులన్నీ కొత్తచిగురు తొడుగుతాయి ఆమనిలో
ప్రతిమదిలొ పులకింతలు రేపుతాయి ఆమనిలో

విరబూసిన విరికన్నెలు మకరందం నింపుకుంటు
వసంతుడీ ఆగమనము కోరుతాయి ఆమనిలో

మధురమైన అనుభూతితొ మనసుకెంత ఉల్లాసమో
మధువునిండి పుష్పములే నవ్వుతాయి ఆమనిలో

మధుమాసపు సొబగులన్ని ఆహ్వానము ప్రకటిస్తూ
చిగురాశలు చిలుకరిస్తు వచ్చినాయి ఆమనిలో

ఆకురాలి ప్రతిచెట్టూ చివురాకులు అలవరించి
కోయిలలకు స్వాగతాలు పలుకుతాయి ఆమనిలో

విరిసివున్న పువ్వులపై నవ్వుకుంటు భ్రమరాలు
మధువునంత జుర్రుకోగ వాలుతాయి ఆమనిలో

సిరిమల్లెలు పరిమళాలు వెదజల్లును వనమంతా
మగువసిగన మురవాలని కులుకుతాయి ఆమనిలో

వేపపువ్వు పచ్చడితో షడ్రుచులూ మేళవించి
ఆరుఋతువుల అర్ధాలనే చాటుతాయి ఆమనిలో

భావాలే పూయిస్తూ వసంతాల సొగసులన్ని
మధుర 'వాణి' కవనంలో నిండినాయి ఆమనిలో

......వాణి,20 March 15