॥ అనుకున్నా॥

నిజముగనే  నువ్వునాకు ఊపిరివని  అనుకున్నా!!
బ్రతుకంత నీతోనే నడవాలని అనుకున్నా!!

సుకుమారపు పాదాలను కష్టపెట్ట కుండానే
భుజములపై భారమైన మోయాలని అనుకున్నా !!

నీకన్నులు తడువకుండ కలతలేవీ దరిచేరక
నొప్పించే  సంగతులను దాచాలని అనుకున్నా!!

వేకువలో రేతిరిలో ఇడుములెన్ని  పడినగాని
వికసింపుతొ నారూపం చూపాలని అనుకున్నా!!

గుండెలోని బాధలన్ని నానీడతొ చెప్పుకుంటు
నీవదనము వెలుగులతో  చూడాలని అనుకున్నా !!

మధురమైన 'వాణి'యలను నిద్దురలో మెలకువలో
అనుక్షణం ఆలకిస్తు గడపాలని అనుకున్నా!!

...... వాణి,  29 April 15