గజల్....

ప్రేమపంచు మనసులకై విశ్వమంత వెతకాలి ||
నిస్వార్ధపు మమతకొరకు గతమంతా వెతకాలి ||

నవ్వులన్ని నటనమౌతు మొహమాట రూపమౌతు
స్వచ్చమైన పలుకులకై లోకమంత వెతకాలి ||

మాసిపోయి మానవతే కనిపించక కరువౌతు
త్యాగమున్నజనాలకై జగమంతా వెతకాలి ||

ప్రసవించగ చెట్టునొకటి పుడమికెంత భారమో
విత్తునాటు మట్టికొరకు నేలంతా వెతకాలి ||

లెక్కలలో మిక్కిలైన జనులున్నా దేశంలో
మాటాడే చిరునవ్వుకై మనమంతా వెతకాలి ||

మారలేదు మగువబతుకు నిలదీస్తే నిందవేస్తు
గెలుపు'వాణి' గాధలెన్నొ చరిత్రంతా వెతకాలి ||