పరిగెట్టే హాసాలకు గాలమెవరు వేస్తారూ ॥
సలుపుతున్న వేదనలకు సంకెలెవరు వేస్తారూ ॥

ఇంకిపోయి కునుకంతా తిమిరంలో తచ్చాడెను
పీడించే రాత్రములకు పానుపెవరు వేస్తారూ ॥

కరుగుతున్న క్షణాలన్ని కలవరాలు ప్రకటిస్తే
జ్ఞాపకాల ప్రతిమలకు ముసుగులెవరు వేస్తారూ ॥

గతమైనా కాలమంత గుండె నొదలి పోలేదు
ఆగిపోని అశ్రువులకు తాళమెవరు వేస్తారూ ॥

తపనపడ్డ ఆశలెన్నొ దు:ఖాలను మింగాయి
నలుగుతున్న స్వప్నాలకు రంగులెవరు వేస్తారూ ॥

తడిమనసుతొ తల్లడిల్లి నా వాణీ మూగబోయె
గండిపడ్డ కన్నులకు వంతెనెవరు వేస్తారూ ॥

..వాణి, 28 march 16