గజల్ కాన్వాస్.....

నింగినుండి తనచూపులు దిగివచ్చెను నా కోసం ||
కనుపాపకు ఓదార్పును అందించెను నా కోసం ||

కన్నీటి సముద్రంలొ బ్రతుకునావ మోస్తున్నా
తెరచాపగ తనప్రేమను అర్పించెను నాకోసం||

చుక్కల్లో తనజాడను ఎంచలేని దుఃఖాలే
తననీడతొ దారిచూప కదిలొచ్చెను నాకోసం||

కలతమనసు ఈదలేక ఉప్పెనలతొ వేగలేక
తనమనసే నా ఊహలొ జన్మించెను నాకోసం ||

చేరలేని దూరమౌతు భారమాయె జీవనం
కనిపించని దేవతగా తరలొచ్చెను నా కోసం ||

తనఉనికిని తెలియజేయు ప్రక్రుతిచ్చు సంకేతం
మౌనంగా తనవాణీ వినిపించెను నాకోసం||

చిరుగాలుల సందోహం తనమమతల మాధుర్యం
ఓ సమీర తరంగమై ప్రభవించెను నాకోసం||

.......వాణి ,1 march 16