ఇడుములలో స్నేహముతో నడిపించుట తెలియాలీ ||
దరహాసం పెదవులపై కురిపించుట తెలియాలీ ||

తల్లడిల్లె తడిచుక్కలు తలగడనే తడుముతూ
అలజడులలొ తమకుతాము సవరించుట తెలియాలీ ||

మౌనమెంత మేలుకదా ఓపలేక జాలిచూపు
గాయపడ్డ గుండెనైన గెలిపించుట తెలియాలీ ||

స్వాగతాలు పలకాలిక కొత్తదనపు జీవితం
కలవరాల కాలాలను తొలగించుట తెలియాలీ ||

ఙ్ఞాపకాలు మరుగవనివి వేదనలో లాలనలో
మదనపడ్డ క్షణాలన్ని మరిపించుట తెలియాలీ ||

ఆవేదనొ అతిశయమో భిన్నమైన భావనమూ
నొప్పించే నిందలనే ఎదిరించుట తెలియాలీ ||

మౌనాన్ని మోస్తున్నది పెదవంచున నా వాణీ
మదిభావం అక్షరములొ ఒలికించుట తెలియాలీ ||

నిట్టూర్పుల నిరీక్షణలు వడలిన నా వదనములో
నడచివొచ్చు అద్భుతాన్ని వరియించుట తెలియాలీ ||

........వాణి, 4 march 16