మనసులోన పెల్లుబికే దు:ఖాలను ఆపలేము ||
జలనిధిలో ఎగసిపడే కెరటాలను ఆపలేము ||

గుండెలోన దిగులుమబ్బు కనులజారు చినుకులెన్నొ
కంటిలోన ఉబికివొచ్చు రోదనలను ఆపలేము ||

ఎన్నెన్నో వేదనలను ఏమార్చును సంతసాలు
తెలియకుండ ఎదురువచ్చు కష్టాలను ఆపలేము ||

మనసుతడితొ మౌనంగా జ్ఞాపకాలు మాట్లాడెను
ఊరడించి ఊతమిచ్చు కవనాలను ఆపలేము ||

అక్షరాల వనములోన విహరిస్తూ కలమునౌతు
మదిచెప్పే మౌనభాష భావాలను ఆపలేము ||

చీకటంత చిందిపడెను చిరునవ్వును తరిమేసెను
దారిచూపు ధైర్యమిచ్చు కిరాణాలను ఆపలేము ||

మౌనవాణి పెదవిమాటు వెలివేయని ఆవేదన
చెమ్మగిల్లి చూపులలో తాపాలను ఆపలేము ||

కనుపాపల కలలన్నీ కన్నీటిలొ కలగలసిన
ఆశపడే రేపటిలో వేకువలను ఆపలేము

గాయపడ్డ గుండెలే నిశబ్దంగ మిగిలిపోయి
చెమరించే కన్నులలో శోకాలను ఆపలేము

గెలుచుకున్న ఆశయాలు సంతృప్తిని సాధించెను
నిదురించే మనసుల్లో స్వప్నాలను ఆపలేము

....వాణి , 4 jan 16