గజల్ కాన్వాస్ ....50

ఎదురుచూపు కన్నీళ్ళే తాగాయీ ఆ కన్నులు ||
కనురెప్పలు కదలాడక వెతికాయీ ఆ కన్నులు ||

తడితలపుల ఆనవాళ్ళు వీడిపోని జ్ఞాపకాలు
చీకటిలో వెలుతురులో తడిమాయీ ఆ కన్నులు ||

గతాలలో అనుభూతులు మదినివీడి పోకున్నవి
అవధిలేని నిరీక్షణలొ గడిపాయీ ఆ కన్నులు ||

తెరచుంచిన కనుపాపకు వేచిచూచు వేదనలే
ఎడబాటుల క్షణాలలో నిలచాయీ ఆ కన్నులు ||

నిట్టూర్పుకు ఓదార్పులు ఇంకిపోని తడిజాడలు
నిలదీసే నిమిషాలను నిలిపాయీ ఆ కన్నులు ||

కరుగుతున్న కాలముపై కన్నీటివి సంతకాలు
మౌనవాణి మనసుదోచి మిగిలాయి ఆ కన్నులు ||

........వాణి,21 March 16