గజల్ ..

.
మౌనానికి మరుపులద్దు భావంలా ఉన్నానా?
మదిపాడే గీతానికి రాగంలా ఉన్నానా?

.
దుఃఖాన్నే కాలానికి కానుకగా ఇచ్చేస్తూ
హసితాలను హత్తుకున్న కెరటంలా ఉన్నానా?

.
జ్ఞాపకాల గాలితాకి తలపు తల్లడిల్లుతోంది
చిరుననవ్వుల చెలిమిలేని మౌనంలా ఉన్నానా?

.
కలలలోన రంగులెన్నొ కనులుగెలుచు కోవాలని
శూన్యమైన వీధుల్లో స్వప్నంలా ఉన్నానా ?

.
ఓటమినే స్వాగతించు అలసిపోని గెలుపునేను
సింధువులో మెరుస్తున్న ముత్యంలా ఉన్నానా ?

.
మధురవాణి హృదయంలో పల్లవించు అనురాగం
మమకారపు మధువనిలో భ్రమరంలా ఉన్నానా ?

.
.......వాణి, 5 Sep 16