మాటాడని ప్రతిమలాగ మిగిలినావు నా మనసున ||
గుండెతడిలొ గేయముగా చేరినావు నా మనసున ||

నిశినిండిన రహదారిన నిన్ను వెతుకుతున్నాను
కలలలోన కదలాడుతు మెదిలినావు నా మనసున ||

చీకటింట మరచినాను చిరునవ్వుల అందాలను
చెలమిస్పర్శ మిణుగురువై తాకినావు నా మనసున ||

కడలిలోని కెరటంలా అలసిపోని ఓటమినే
ఓ భావపు గీతికవై మిగిలినావు నా మనసున ||

నిన్నలన్ని వేదనకే కానుకిచ్చి పంపానా
కన్నీటితొ కావ్యంగా చేరినావు నా మనసున ||

మౌనవాణి అక్షరాలు మధురమనె అనుకున్నా
నిశ్శబ్దపు పయనంలో నిలచినావు నా మనసున ||

......vaani , 13 oct 16