మౌనానికి మాటలెలా నేర్పాలో తెలియలేదు ll
కనుపాపకు కలలు ఎలా అద్దాలో తెలియలేదు ll

మదిముచ్చట వింటున్నా మౌనంగా వుండాలి
భావానికి బాధనెలా చెప్పాలో తెలియలేదు ll

అంతరంగ పయనంలో కబురులెన్నొ దాచాను
ఎదలోతుల కథలుఎలా విప్పాలో తెలియలేదు ll

కంటిలోని ప్రతిమకెన్ని గాయాలో తెలుసామరి
రెప్పలకే లాలి ఎలా పాడాలో తెలియలేదు ll

నిశీధిలో దాగుండిన వర్ణాలను వెతకాలి
రంగులలో తడిసి ఎలా మురవాలో తెలియలేదు ll

ఆనందపు ఆహ్వానం కావాలని వుంటుంది
మమకారపు దారి ఎలా వెతకాలో తెలియలేదు ll

మధురవాణి ఆలాపన మనసు పులకరిస్తున్నది
ఆ పిలుపుల దరికి ఎలా చేరాలో తెలియలేదు ll

....వాణి , 7 Oct 16