శూన్యంలో నీ జాడలు వెతకలేక పోతున్నా ll
గమనంలో నీ ఉనికిని గెలవలేక పోతున్నా ll

ఓటమిగా మిగిలానని నిశ్శబ్దాల దండయాత్ర
నీవులేని లోకంలో నిలువలేక పోతున్నా ll

హాసానికి బదులిమ్మని సమాజమే బాధిస్తే
నటియించే నవ్వులతో మసలలేక పోతున్నా ll

నా ముందరి ఆనవాళ్ళు ప్రశ్నిస్తూ వున్నాయి
మదిలోతుల భావాలను ఒంపలేక పోతున్నా ll

కరిగిపోయి ఆశవే కలగా మిగిలిపోయావె
నైరాశ్యపు నీడలోన బ్రతకలేక పోతున్నా ll

కాలమిలా మోస్తున్నా కన్నీటిని ఒలికిస్తూ
ఆనందపు ఆచూకిని అందలేక పోతున్నా ll

పొత్తిళ్ళ పాపడిగా పొదుముకుని మురిశానే
మాయమైన నీ స్పర్శను మరువలేక పోతున్నా ll

ఏటేటా సంబరాలు అంబరాన్నంటేవే
మిన్నలలో నీవుంటే ఓపలేక పోతున్నా ll

కాలమెంత కరిగినా దుఃఖానికి బానిసనే
నీ ధ్యాసే ప్రతిక్షణం చూడలేక పోతున్నా ll

ప్రతిరాత్రీ జాగారం నీ ఉహతో ముచ్చట్లూ
ఉదయానికి ఆహ్వానం పలుకలేక పోతున్నా ll

అలనాటిది ఆనందం చరిత్రగా మిగిలెకదా
చిరునవ్వుకు బాసటగా నిలువలేక పోతున్నా ll

ఎదురుచూపుకు ఆశలెన్నొ క్షణాలన్ని లెక్కిస్తూ
నీ రూపం అపురూపం కాంచలేక పోతున్నా ll

తప్పటడుగుల తప్పిదాలు ఏమార్చిన నిర్లక్ష్యం
తరలిపోయె నీ తనువే తాకలేక పోతున్నా ll

గాయమైన గుండెనాది అర్ధాంతర ముగింపునీది
గమనాలను భారంగా గడపలేక పోతున్నా ll

అద్భుతమే జరగాలని ఆరాటం నాదికదా
అన్వేషణ మార్గాలను తెలియలేక పోతున్నా ll

రెక్కలెక్క డుంటాయి నీవుండే దరిచేరాలి
బాధ్యతలే బరువులైన దించలేక పోతున్నా ll

తడితలపుల్లొ నువ్వెపుడూ తచ్చాడుతు వుంటావు
ఙ్ఞాపకాన్ని వద్దంటూ వీడలేక పోతున్నా ll

గుండెలోని గుర్తులవి ఇంకిపోవు కన్నీళ్ళు
అలసటగా నా పయనం ఆపలేక పోతున్నా ll

ఇరవైలో అడుగిడావు ఎక్కడనీ వెతకాలీ
అడుగడుగున అవాంతరం కలవలేక పోతున్నా ll

ఏ లోకం నీదైనా నీ లోకం నాదేలే
ప్రతి భావం నీ కోసం మారలేక పోతున్నా ll

.........వాణి, Vaddamani Avinash 26 Oct 16