నిశీధిలో వెలుతురుకై తడిమినాను వింతకదా ||
ఎడారిలో చిగురాకులు వెతికినాను వింతకదా ||

నిర్వేదన నిర్లక్ష్యం చూపుకెన్ని గాయాలో
మనసులోకి మౌనంగా నడచినాను వింత కదా ||

భారమైన ఘడియలెన్నొ గుండెసర్ధుకుంటుంన్నది
మధురవాణి భావాలను అల్లినాను వింతకదా ||

చిరునవ్వును తాకుతున్న చెలిమిమంత్రమేమిటది
కలలలోన కోరికలను దాచినాను వింతకదా ||

ఊహఅనే రెక్కలతో మనసునడక మొదలైనది
ఆనందం అర్ణవమై ఎగిరినాను వింత కదా ||

విరక్తినే మదిలోతున నిషేదించ ప్రయత్నమే
అక్షరాల చెలిమితోన సాగినాను వింతకదా||

వెలగలేని ఓటమది నిర్జీవపు చిహ్నమది
మండుతున్న వేదనలో మరలినాను వింతకదా ll

రగులుతున్న గాయానికి చిరునవ్వులు సాధ్యమా
దుఖ:మునకు హసితాలను అద్దినాను వింతకదా ll

.....వాణి, 3 Oct 16