గజల్ .....

వేదనలో మధురమైన మౌనభాషయే గజల్ ||
అక్షరాల వెలుగునింపు కాంతిబాటయే గజల్ ||

చీకటిలో దీపమౌతు చెరిపివేయు దుఃఖాలు
కన్నీటికి రాగమద్దు మనసుమాటయే గజల్ ||

ఎదలోతుల దీనగాధ దిగులుపొరను దాచలేక
చూపులకే మెరుపులద్దు తళుకుతారయే గజల్ ||

కనుపాపల సంద్రంలో ఙ్ఞాపకాల జల్లుల్లో
చలచల్లని మమతపంచు మంచువానయే గజల్ ||

శిధిలమైన చిరునవ్వులు రాలిపోయి స్వప్నాలు
పల్లవించు చైతన్యపు స్నేహధారయే గజల్ ||

మౌనవాణి భావనలో గేయమైన గాయాలు
కలలెన్నో నింపుకున్న వెలుగురేఖయే గజల్ ||

కునుకులేని రేయిలోన శూన్యంతో సంభాషణ
రెప్పలకే మమకారపు జోలపాటయే గజల్ ||

......వాణి , 3 Sep 16